Ezekiel Jakob Hansen, útskrifaður nemandi úr Tækniskólanum, bar sigur úr bítum í pípulögnum á Íslandsmótinu í iðn- og verkgreinum sem fram fór í Laugardalshöll um og fyrir helgi. Keppendur leystu verkefni sem kallaðist „Hitakerfi, fram- og bakrás“.

Verkefnið var unnið á timburvegg sem var tveir metrar á breidd og tveir á hæð. Keppendur lögðu stofnlögn fram- og bakrás frá og að mælagrind, einfalt hitaveitukerfi þar sem bakrásin, að notkun lokinni, fer í frárennslið. Inn á stofnlögnina var komið fyrir handklæðaofni sem nemendur beygðu sjálfir og smíðuðu.

Verkefnið sýnir brot af vinnu við hitakerfi sem pípulagningarmenn vinna við. Afrakstur nemendanna var metinn út frá málsetningum, suðu í tini, ásýnd, áferð, umgengni við vinnusvæðið og snyrtimennsku.

„Nemendur höfðu 18 tíma til að vinna verkið,“ sagði Böðvar Ingi Guðbjartsson, formaður Félags pípulagningameistara, umsjónarmaður keppninnar, þegar FIT heimsótti keppnisstað á fimmtudag. „Þetta eru þrír nýútskrifaðir sveinar og einn sem er á leið í sveinspróf. Þeir eru allir á sama aldri og svipað langt komnir,“ sagði Böðvar, sem hélt að þessu sinni utan um sína fjórðu keppni af þessum toga.

Ezekiel Jakob verður fulltrúi á Íslands á Euroskills.

Vatnsvirkinn, Vatn og veitur, TENGI og BYKO voru styrktaraðilar keppninnar í pípulögnum.

Keppni í málaraiðn

Þrír nemendur kepptu í málaraiðn. Það voru Hildur Magnúsd. Eyrunardóttir, Jóhann Árni Sigmarsson og Vilhjálmur Þór Olsen, öll úr Tækniskólanum. Nemendur máluðu skreytingu sem innihélt fjarvídd á tveggja metra vegg.

Hildur varð hlutskörpust og er því Íslandsmeistari í málaraiðn.

Styrktaraðilar keppni í málaraiðn voru BM Vallá, Álfaborg, BYKO, Húsasmiðjan, Hagi, Vörukaup og Danfoss.

Sigurvegarar á Minni framtíð, Íslandsmóti iðngreina 2023:

• Bakaraiðn, Finnur Guðberg Ívarsson, Bláa Lónið
• Bifreiðasmíði, Sólborg Birta Steinbergsdóttir, Borgarholtsskóli
• Bílamálun, Sara Gígja Geirsdóttir, Borgarholtsskóli
• Forritun, Bjartur Sigurjónsson,Tækniskólinn
• Grafísk miðlun, Olivier Piotr Lis, Tækniskólinn
• Gull- og silfursmíði,Benedikt Axelsson, Tækniskólinn
• Húsasmíði,Van Huy Nguyen,Tækniskólinn
• Kjötiðn, Björn Mikael Karelsson, Hótel og veitingaskólinn
• Fataiðn,Vilborg Magnúsdóttir,Tækniskólinn
• Málaraiðn,Hildur Magnúsd. Eyrúnardóttir,Tækniskólinn
• Málmsuða,Hafþór Karl Barkarson,VMA
• Múraraiðn,Arnar Freyr Guðmundsson,Tækniskólinn
• Pípulagnir,Ezekiel Jakob Hansen,Tækniskólinn (Útskrifaður)
• Rafeindavirkjun,Hlynur Karlsson,Tækniskólinn
• Rafvirkjun,Gunnar Guðmundsson, Tækniskólinn
• Snyrtifræði, Kristín Ýr Gísladóttir, Fjölbrautaskólinn í Breiðholti
• Liðakeppni í Vefþróun, Gabríel Bergmann Friðriksson, Tækniskólinn, Shishir Jayendra Patel, Tækniskólinn og Sebastian Mateusz Lenart, Tækniskólinn.
• Veggfóðrun og dúkalögn, Magnús Breki Þórarinsson, Tækniskólinn
• Framreiðsla, Finnur Gauti Vilhelmsson, VOX Brasserí
• Hársnyrtiiðn, Irena Fönn Clemmensen, Verkmenntaskólinn á Akureyri