Verkfalli starfsmanna í álverinu í Straumsvík aflýst

Verkfalli aflýst en kjaradeilan enn óleyst. 

Starfsfólk leiksoppar í hagsmunatafli Rio Tinto. 

Suðumadur

Samninganefnd starfsmanna í álverinu í Straumsvík tók ákvörðun um að aflýsa áður boðuðu verkfalli sem hefjast átti á miðnætti í gærkvöldi.

Þetta segir í fréttatilkynningu sem samninganefndin sendi frá sér í gærkvöldi.

Kjaradeilan er áfram óleyst en ákvörðunin um að aflýsa verkfallinu var tekin þar sem sýnt þótti að raunverulegur samningsvilji sé ekki fyrir hendi hjá eiganda álversins, Rio Tinto.

Að mati samninganefndarinnar er gagnslaust að halda verkfallinu til streitu, enda hafi ítrekað komið fram hótanir þess efnis að álverinu verði lokað og sökinni þá skellt á starfsfólkið fyrir að sækja lögbundinn rétt sinn og kjarabætur.

Krafa starfsfólksins er og hefur alltaf verið skýr. Sambærilegar launahækkanir og samið hefur verið um á almennum vinnumarkaði og áréttað er að í engum kjarasamningum hafa starfsmenn þurft að semja frá sér störf yfir í annað og lakara launa- og réttindakerfi.

Kjarasamningur verkalýðsfélaganna við ISAL hefur tryggt fyrirtækinu meiri vinnufrið og stöðugt og gott aðgengi að starfsfólki. Það er því starfsfólkinu þungbært að upplifa sig sem leiksoppa í hagsmunatafli Rio Tinto gegn launafólki víðsvegar um heiminn.