hilmar c

Þessa dagana er verið að gera skoðanakönnun meðal félagsmanna um áherslumál í komandi kjarasamningum. Könnunin verður opnuð á milli jóla og nýárs og mun standa til 15. janúar. Ég hvet alla félagsmenn til þess að taka þátt í könnuninni, því betri sem þátttakan verður, því betri og réttari verða skilaboðin til félagsins varðandi komandi samninga.

Engin sátt nema allir taki þátt

Kjarasamningar eru stóra verkefnið framundan. Viðræður um nýjan samning eru hafnar við Ísal og Norðurál. Einnig standa yfir sérkjaraviðæður við SA, Reykjavíkurborg, sveitarfélögin og ríkið auk annarra aðila. Fljótlega eftir áramót verður farið að ræða launalið nýrra kjarasamninga á almenna vinnumarkaðnum.

Við upphaf samningalotunnar nú eru ýmis jákvæð teikn á lofti en annað veldur vonbrigðum. Góðu fréttirnar eru m.a. þær að atvinnuástand er gott og segja má að full atvinna sé nú í landinu. Farið er að bera á að einn og einn iðnaðarmaður, sem fluttist til útlanda eftir hrun, sé farinn að snúa heim.

Enn getur þó brugðið til beggja vona hvað það varðar. Enginn skortur er á áhugaverðum atvinnutækifærum fyrir íslenska iðnaðarmenn í nágrannalöndunum. Starfskraftar þeirra eru eftirsóttir erlendis, ekki síður en starfskraftar annarra stétta.

Eins og félagsmönnum er líklega í fersku minni var gengið frá kjarasamningum á aðventunni í fyrra. Gerður var svonefndur aðfararsamningur, til eins árs. Lögð var áhersla á kaupmáttaraukningu og hóflegar hækkanir. Orðið aðfararsamningur felur í sér fyrirheit um frekari kjarabætur í náinni framtíð.

Helstu forsendur aðfararsamningsins gengu eftir, verðbólga hefur verið lítil og verðlag stöðugt. Í heildina er batinn hægari en vonir stóðu til. Ekki er hægt að segja annað en að það sem fram kom í fjárlagafrumvarpinu séu kaldar kveðjur til okkar launamanna. Lengi hefur verið talað um að jafna lífeyrisréttindi milli almenna og opinbera geirans en afnám jöfnunar á örorkubyrði hefur þau áhrif að lífeyrisjóðir á almenna markaðinum verða að skerða réttindi sem leiðir ekki til aukinnar jöfnunar.

Virða ekki skuldbindingu gagnvart samfélaginu

Eitt af því sem veldur vonbrigðum er að þótt fyrirtækin hafi skilað góðum hagnaði hafa eigendur þeirra tekið hann út sem arð en ekki lækkað vöruverð til almennings. Þetta er dapurleg staðfesting á að fyrirtækin virða ekki þá skuldbindingu að skila út í samfélagið árangrinum sem hefur náðst vegna ábyrgrar kröfugerðar og samningsafstöðu verkalýðsfélaganna. Einnig eru vonbrigði að þótt gengi krónunnar hafi styrkst hefur það heldur ekki skilað sér í lægra vöruverði til neytenda.

Ekki er hægt að ætlast til af launafólki á almennum vinnumarkaði, að það leggi fram það sem þarf til að búa til hagvöxt og arð í þjóðfélaginu en síðan komi aðrir og taki til sín alla uppskeruna. Ef til stendur að halda áfram að ræða um samstöðu í komandi kjarasamningum, verða allir að taka þátt í henni. Það er ljóst að félög á almennum markaði munu ekki sitja hjá á meðan aðrar stéttir semja um tuga prósenta launahækkanir, m.a. við ríki og sveitarfélög, eins og dæmi eru um.

Á félags- og faggreinafundum sem haldnir voru víða um land á dögunum var m.a. farið yfir launaþróun og skoðaðar breytingar frá 2006. Fjallað er um efni fundanna í Fréttabréfinu og glærur af fundunum eru á heimasíðu félagsins.

Vörugjaldalækkun skili sér út í verðlagið

Þessa dagana er Alþingi að afgreiða hækkun á virðisaukaskatti á matvæli og fleira en afnema um leið vörugjöld af ýmsum innflutningi. Verkalýðshreyfingin mun fylgja því eftir að lækkun vörugjalda skili sér að fullu út í verðlagið og fylgjast með því um áramótin að ríki og sveitarfélög velti ekki kostnaði af launahækkunum einstakra hópa opinberra starfsmanna yfir á herðar almennings, með hækkunum á gjaldskrám fyrir opinbera þjónustu. Að lokum vil ég óska félagsmönnum öllum og fjölskyldum þeirra gleðilegrar hátíðar og velfarnaðar á nýju ári.

Með félagskveðju

Hilmar Harðarson

 

Sumarmynd FIT 2008.

FIT efnir til ljósmyndasamkeppni meðal félagsmanna sinna, "sumarmynd FIT 2008".
 

Þátttakendur senda inn myndir á netfangið This email address is being protected from spambots. You need JavaScript enabled to view it.. ásamt skýringum á myndinni,netfangi og símanúmeri. Skilafrestur er til 15.september 2008. Myndefnið á að vera frá sumarfríi félagsmannsins hérlendis eða erlendis áþessu ári.
 

Verðlaun fyrir fyrstu 3 sætin er gisting í viku í orlofshúsum félagsins í vetur. Auk þess verða allar innsendar myndir birtar í ljósmyndaalbúmi á heimasíðunni að lokinni keppni.
 

FIT áskilur sér rétt til að birta innsendar myndir í fréttabréfi eða á heimasíðu félagsins án greiðslu.

   
  Hilmar Harðarson
Formaður

ÞARFAGREINING, NÁMSKEIÐ OG HEILSURÆKT
 

Undanfarna mánuði hefur verið unnið að þarfagreiningu meðal atvinnulausra félagsmanna. Þar  hefur verið reynt að greina hvaða námskeið og önnur úrræði hentuðu flestum atvinnulausum. Afraksturinn er að skila sér í fjölda ókeypis námskeiða hjá Iðunni og fleiri stofnunum sem vinnumarkaðsúrræði og styrkt eru af Vinnumálastofnun og stéttarfélögunum. Eins og fram kemur annarsstaðar hér í blaðinu mun FIT styrkja atvinnulausa félagsmenn sína til að stunda líkamsrækt, en FIT er aðili að samningi ASÍ við Samtök heilsuræktarsstöðva.

VIÐTÖL VIÐ RÁÐAMENN

Í janúar og febrúar ræddi Samiðn við ráðamenn stofnana og fyrirtækja um horfur í atvinnumálum. Meðal annarra sem rætt var við voru fulltrúar Orkuveitunnar og Landsvirkjunar, ráðherra vegamála og ráðherra iðnaðarmála einnig forsvarsmenn viðhalds fasteigna ríkisins. Á fundunum var lögð sérstök áhersla á að sjónum yrði beint að mannfrekum verkefnum Sérstaklega voru ráðherrarnir minntir á að Samiðn hefði lagt áherslu á 100%  endurgreiðslu virðisauka á byggingarstað og við viðhald húsnæðis. Fjármálaráðherra lagði fram frumvarp um þetta þann 9. febrúar og var það rætt þann 10. febrúar en hefur setið fast í nefnd síðan.

SAMBANDSSTJÓRNARFUNDUR, FRESTUN
LAUNAHÆKKANA


Í síðasta mánuði boðaði Samiðn til sambandsstjórnarfundar sem haldinn var á Grand Hótel. Eitt af því sem þar var til umræðu var sú ósk Samtaka atvinnulífsins að fresta umsömdum launahækkunum 1. mars. Á fundinum kom fram að mikil hætta væri á að SA segði upp gildandi kjarasamningi eins og heimild var fyrir og var samþykkt með þorra atkvæða að heimila samninganefnd ASÍ að semja um frestun á launahækkunum frekar en að honum yrði sagt upp og þar með glötuðust verðmæti úr samningnum sem semja þyrfti þá um að nýju. Þarna munar mestu fyrir málmiðnaðarmenn og aðra sem ekki hafa fengið 30. orlofsdaginn eftir 10 ára starf í fyrirtæki, að 1. maí n.k. munu þeir ná honum inn og fá 13,04% orlof á laun. Niðurstöðu samninganefndar ASÍ má lesa um hér annarsstaðar í blaðinu.

AÐGERÐIR STRAX


Nú fara menn að verða langeygðir eftir aðgerðum ríkisstjórnarinnar til að sporna við atvinnuleysi og horfa flestir þá til lækkunar á stýrivöxtum. Það getur ekki gengið lengur að fyrirtæki og heimilum sé siglt í strand með vaxtaokri. Öll lönd í hinum vestræna heimi hafa lækkað stýrivexti t.d. eru stýrivextir á Englandi þeir lægstu í sögunni en hér á Íslandi eru þeir í sögulegu hámarki. Svo koma eftirlitsmenn Alþjóðagjaldeyrissjóðsins fram í fjölmiðlum og undrast að atvinnuleysi skuli aukast jafn mikið og raun ber vitni. Eigum við að hlæja eða gráta yfir svona málflutningi. Það verður að lækka stýrivexti mikið og það strax til að koma hjólum atvinnulífsins aftur á snúning.

 


Hilmar Harðarson
Formaður

- Sameiningar hafa eflt félagið gríðarlega

Hilmar Harðarson er formaður og framkvæmdastjóri Félags iðn- og tæknigreina. Félagið varð til á vormánuðum árið 2003 þegar Bíliðnafélagið - Félag blikksmiða, Málarafélag Reykjavíkur, Sunniðn, Félag byggingaiðnaðarmanna í   Hafnarfirði og Félag garðyrkjumanna sameinuðust. Seinna bættust við Sveinafélag málmiðnaðarmanna á Akranesi, Iðnsveinafélag Suðurnesja, Sveinafélag járniðnaðarmanna í Vestmannaeyjum og Sveinafélag pípulagningarmanna. Hilmar segir að félagið sé stéttar- og fagfélag fyrir iðn- og tæknigreinar í nútíma samfélagi með áherslu á hagsmunagæslu og menntun fyrir félaga sína. Félagsmenn eru tæplega 4000 talsins og fer fjölgandi enda erum við stærsta einstaka iðnaðarmannafélagið á landinu, og mikil gróska í félaginu. 
“Í upphafi voru efasemdir um að þessi ólíku félög ættu samleið en það er ljóst að allir sprotar félagsins hafa eflst við sameininguna”, segir Hilmar. Hann segir að allir séu að vinna að sömu markmiðum og nú hafi verið náð hagkvæmari rekstri á félagseiningunni og því sé meira fé í að efla bæði endurmenntun og fræðslu á meðal félagsmanna. Nýi kjarasamningurinn kemur í fyrsta skipti inn á endurmenntun á launum. Þar eru mikil sóknarfæri fyrir félagið að ná til þess fólks sem vill frekar sinna faglegum en ekki pólitískum málum í félagsstarfinu. Við höfum verið að halda sérstaka faggreinafundi, þar sem menn í öllum greinum félagsins hittast og ræða faglegan þátt sinnar greinar. Þeir fundir hefjast gjarnan á sameiginlegum fundi þar sem haldnir eru áhugaverðir fyrirlestrar og svo skiptast hóparnir upp og hver grein heldur fund um sín mál. segir Hilmar. ,,Við erum að sameina nokkrar ólíkar greinar en iðnaðarmenn á Íslandi eiga mjög margt sameiginlegt. Til dæmis eiga garðyrkjumaðurinn og málarinn sameiginlega hagsmuni í launum og kjörum þó faglegu þættirnir séu ólíkir. Sameiginlega geta þeir verið þátttakendur í sterku og öflugu félagi þar sem faggreinarnar fá að njóta sín.” Hilmar segir að aðalverkefni félagsins séu alltaf kjaramál og réttindamál þeirra greina sem standa að félaginu. ,,Auk þess erum við með öfluga sjóði, sjúkrasjóð, sem sífellt er að auka greiðslur og þjónustu, orlofssjóð sem margir öfunda okkur af, menntasjóð, sem innan fárra ára verður einn sá öflugasti, félagssjóð sem stendur mjög vel og góðan verkfallssjóð sem í dag vex og vex af vaxtatekjum. Við erum því gríðarlega öflugt félag á íslenskan mælikvarða”, segir Hilmar.
 

Aukin þjónusta

Hilmar segir að í nútíma samfélagi vilji félagsmenn fá þjónustuna nær sér. ,,Þess vegna erum við að taka vefinn okkar í gegn og munum leggja mikla áherslu á aukið þjónustustig þar, með upplýsingum um félagið og þjónustu þess ásamt rafrænum samskiptum. En að sjálfsögðu munum við taka fullt tillit til eldri félagsmanna og sú þjónusta sem við höfum verið með fyrir mun ekki skerðast við þessa auknu þjónustu á netinu. Hilmar segir einnig frá auknu framboði orlofsíbúða, en félagið býður upp á 27 orlofsbústaði víðs vegar um landið og tjaldvagna. ,,Við erum að taka íbúð í Vestmannaeyjum í gagnið sem við höfum endurnýjað mikið. Við erum nýlega búin að kaupa hús á Flórída og hafa viðtökurnar við því verið frábærar og nú erum við að skoða fleiri möguleika eins og kaup á íbúðum í Kaupmannahöfn og Berlín. Svo höfum við íbúð á Spáni sem okkar félagsmenn hafa einnig nýtt mikið á veturna. Síðan er verið að taka sumarhúsin okkar í gegn. Við viljum að fólk njóti dvalarinnar í orlofshúsum félagsins, og við þolum allan samanburð í þessum efnum, fá ef nokkur félög standa okkur á sporði í orlofsmálum”, segir Hilmar.

 

Nýir kjarasamningar

Hilmar segir að menn hafi tekist á við erfitt verkefni við gerð kjarasamninga. Það var haldin trúnaðarmannaráðstefna síðastliðið haust um hvað við ættum að leggja upp með í þessum kjarasamningum. Við fengum það hlutverk að semja um aukið frí og hækkun lægstu launa.,,Það er ljóst að efnahagsmálin hafa verið í uppnámi og miðað við stöðuna tel ég að við höfum náð ásættanlegum árangri. Niðurstaða kosninga um samningana sýnir að félagsmenn virðast einnig vera sáttir. Það var mikilvægt að hækka lægstu launin sérstaklega, annars hefði bilið enn aukist á milli greiddra launa og launataxtanna. Ef menn hækka ekki lægstu launin þá verður öryggisnet félagsmanna lægra. Við verðum að passa að launataxtar séu ekki allt of lágir því að á samdráttartímum eru launin það fyrsta sem ráðist er á við hagræðingu í rekstri fyrirtækja. Það er einnig ljóst að í þeim greinum þar sem ennþá er þensla og vöntun á starfsfólki, mun launaskrið halda áfram, segir Hilmar.

Hilmar segir að félagið hafi viljað kynna nýjan kjarasamning vel. ,,Við kynntum samninginn á mörgum mjög vel sóttum fundum með okkar félgsmönnum, allt frá Akranesi til Vestmannaeyja. Við náðum að skýra vel hvað þessi nýi kjarasamningur gengur út á. “Það sem stendur upp úr samningunum er auk hækkunar lægstu launa möguleikinn á endurmenntun á launum, sem er mál sem ég tel gríðarlega mikið framfaraspor, bæði fyrir starfsmenn og fyrirtækin. Þetta er nú komið inn í kjarasamninga og mun sanna sig á næstu árum, með þátttöku bæði stórra og smárra fyrirtækja. Einnig er ávinningur í verulegri breytingu á slysatryggingunum, þar sem náðist að tryggja hækkun á bótum fyrir þá sem eru yngri. Það er þó alveg ljóst að besta kjarabótin verður ef við náum verðbólgunni niður og að kaupmáttur helst áfram og jafnvel eykst. Við höfum þá trú að þessir kjarasamningar stuðli að verðbólguhjöðnun og kaupmáttaraukningu eins og ætlast er til af þeim og endurskoðunarákvæðin segja skýrt til um.

 

Starfið framundan

Hilmar segir það ljóst að samkeppni muni aukast á komandi árum á milli stéttarfélaga. ,,Tímarnir eru að breytast. Fólk er að spyrja hvað það fær fyrir sína aðild að stéttarfélögum. Við ætlum að gera okkar allra besta og standast samkeppnina “ við erum í forystu í dag og ætlum að vera það áfram”. Félaginu hefur gengið mjög vel á síðustu árum. Okkur hefur verið boðið á nokkra félagsfundi annarra félaga þar sem við höfum kynnt það sem við höfum verið að gera. Það hefur leitt til þess að menn vildu ganga til liðs við Félag iðn- og tæknigreina. Stærðin og hagkvæmnin er alltaf að aukast og vonandi mun félagið fá enn fleiri til liðs við sig á næstu misserum. Samlegaðaráhrifin hafa ekki látið á sér standa og við gátum lækkað félagsgjöldin hjá okkur í 0,7% um síðustu áramót og við höfum einnig getað verið með þak á félagsgjöldunum. Við erum með algjöra sérstöðu í þessum efnum”, segir Hilmar “ með þessu gátum við sýnt félagsmönnum að það gengur vel og þeir fá góða þjónustu hjá sínu félagi”. 
Félag iðn- og tæknigreina er aðili að Iðunni fræðslusetri sem er endurmenntunarstofnun iðngreina. Þar er verið að vinna gríðarmikið starf á sviði sí- og endurmenntunar. Tilraunaverkefnið ,,Bættu um betur” er gott dæmi um það og hefur gengið ótrúlega vel. Þar reynum við að ná í þá einstaklinga sem hafa af einhverjum ástæðum fallið út úr námi, og reynum að endurmeta þá aftur inn í kerfið. Það er frábært að sjá þátttökuna, en þarna erum við að ná í einstaklinga og aðstoða þá við að ljúka sínu námi”, segir Hilmar. ,,Öll þessi þjónusta gerir okkur að sjálfsögðu sýnilegri fyrir fólki sem er að vinna í þessum starfsgreinum, og með því vonumst við til þess að þeir sem hafa ekki séð hag sinn í því hingað til að vera í stéttarfélagi nýti sér það að ganga inn í svo öflugt félag. Ég vil líka hvetja alla félagsmenn til að kynna sér og nýta alla þjónustu sem félagið býður uppá. Þeir sem nýta sér endurmenntun njóta almennt betri launakjara. Betri menntun leiðir til meiri framleiðni sem er svo arðsamara fyrir viðkomandi fyrirtæki”. Hilmar hvetur einnig félagsmenn til að mæta á aðalfund félagsins þann 29. mars næstkomandi þar sem verður m.a. kynnt ný heimasíða félagsins og nýr orlofsvefur opnaður. “Þar geta félagsmenn fylgst með og fræðst um stöðu okkar bæði varðandi fasteignir okkar og sjóði", segir Hilmar að lokum.

- Breytingar þær sem hér er fjallað um eiga við kjarasamning Samiðnar og SA, Samiðnar og Meistarasambands byggingamanna, Samiðnar og Sambands garðyrkjubænda og Samiðnar og Bílgreinasambandsins, nema annað sé tekið fram í millifyrirsögn.

LAUNATAXTAR HÆKKA

Umsamdir lágmarkstaxtar hækka þann 1. febrúar um kr. 21.000 hjá iðnaðarmönnum en kr. 18.000 hjá aðstoðarmönnum iðnaðarmanna.


BREYTINGAR Á LAUNAFLOKKUM

Launaflokkur 1 gildir nú um iðnaðarmenn meða sveinspróf eða sambærilega menntun.Inn kemur nýr kauptaxti, launaflokkur 2 fyrir iðnaðarmenn sem ekki uppfylla launaflokk 1 en hafa starfsréttindi frá sínu heimalandi til iðnaðarmannastarfa. Starfsmaður skal þó ekki taka laun skv. þessum launaflokki lengur en 2 ár, enda sýni hann fram á að hann hafi unnið í a.m.k. 2 ár í iðn sinni hér á landi. Starfstími samkvæmt launaflokki þessum telst ekki til starfstíma skv. launaflokki 1. Við tilfærslu í launaflokk 1 byrjar starfsmaður að ávinna sér sjálfstæðan ávinnslurétt skv. launaflokki 1.


LAUNAÞRÓUNARTRYGGING

Starfsmaður sem starfað hefur hjá atvinnurekenda 2. jan. 2007 til 1. febr. 2008 á rétt á 5,5% launahækkun. Frá dragast þó hækkanir sem starfsmaðurinn hefur fengið á tímabilinu.

Starfsmaður sem hóf störf á tímabilinu 2. janúar til loka september á rétt á 4,5% hækkun. Frá dragast þó hækkanir sem starfsmaðurinn hefur fengið fram til 1. febr. 2008


DESEMBER OG ORLOFSUPPBÓT

Full desemberuppbót ársins 2008 verður kr. 44.100. Full orlofsuppbót ársins 2008 verður kr. 24.300. Uppbætur iðnnema reiknast nú sem hlutfall af vinnuframlagi ársins.


STARFSMANNAVIÐTÖL

Starfsmaður á rétt á viðtali við yfirmann einu sinni á ári um störf sín, þ.m.t. frammistöðu og markmið og hugsanlegar breytingar á starfskjörum. Óski starfsmaður eftir viðtali skal það veitt innan tveggja mánaða og niðurstaða þess liggja fyrir innan mánaðar.
 

ORLOFSAUKI MÁLMIÐNAÐARMANNA OG AÐSTOÐARMANNA Í IÐNAÐI

Starfsmaður sem unnið hefur í 5 ár í sömu starfsgrein á rétt á orlofi í 25 virka daga og orlofslaunum sem nema 10,64%. Starfsmaður sem unnið hefur 10 ár í sömu starfsgrein á rétt á orlofi í 27 virka daga og orlofslaunum sem nema 11,59%. Starfsmaður sem unnið hefur 5 ár í sama fyrirtæki á rétt á orlofi í 28 virka daga og orlofslaunum sem nema 12,07%. Starfsmaður sem unnið hefur 10 ár í sama fyrirtæki á rétt á orlofi í 29 virka daga og orlofslaunum sem nema 12,55%. Á orlofsárinu sem hefst 1. maí 2009 breytast 29 dagar í 30 daga og orlofsprósentan í 13,04%. Starfsmaður sem öðlast hefur aukinn orlofsrétt vegna starfs hjá sama vinnveitanda öðlast hann að nýju hjá nýjum vinnuveitanda eftir þriggja ára starf, enda hafi rétturinn verið sannreyndur.
 

ORLOFSAUKI BYGGINGA-, GARÐYRKJU- OG BÍLIÐNAÐARMANNA
Þeir sem starfað hafa lengur en 5 ár í iðn sinni skulu fá fjóra daga til viðbótar, í heild 28 daga, og hafa orlofsprósentu sem er 12,07%. Starfsmaður sem unnið hefur 5 ár í sama fyrirtæki á rétt á 29 virkum dögum og orlofslaunum sem nema 12,55%. Starfsmaður sem unnið hefur samfellt í 10 ár í sama fyrirtæki á rétt á 30 virkum dögum og orlofslaunum sem nema 13,04%.

 

Starfsmaður sem öðlast hefur aukinn orlofsrétt vegna starfs hjá sama vinnveitanda öðlast hann að nýju hjá nýjum vinnuveitanda eftir þriggja ára starf, enda hafi rétturinn verið sannreyndur.
 

AUKINN RÉTTUR IÐNNEMA

Námstími iðnnema í fyrirtæki telst til vinnu í starfsgrein eða til vinnu innan sama fyrirtækis. Veita ber a.m.k. 20 virka daga á tímabilinu 2. maí til 15. september. Orlof umfram það má veita utan þess tímabils og ákvarðast með minnst eins mánaðar fyrirvara. Þeir sem samkvæmt ósk atvinnurekanda fá ekki 20 orlofsdaga á sumarorlofstímabili eiga rétt á 25% álagi á það sem vantar uppá 20 daga.
 

FAGTENGD NÁMSKEIÐ
(ALLAR GREINAR NEMA BÍLGREINAR)

Eftir eins árs starf hjá sama fyrirtæki eiga starfsmenn rétt á að sækja fagtengd námskeið fræðslustofnana samtaka atvinnurekanda og launamanna. Við það er miðað að árlega geti þeir varið allt að 16 dagvinnstundum til námskeiðssetu án skerðingar á föstum launum þó þannig að a.m.k. helmingur námskeiðsstunda sé í þeirra eiginn tíma, utan dagvinnutíma viðkomandi. Heimilt er að geyma þennan rétt milli ára þannig að greiðsluréttur getur orðið allt að 24 dagvinnustundir.
 

Starfsmenn sem unnið hafa þrjú ár samfellt hjá sama fyrirtæki skulu á tveggja ára fresti eiga rétt á allt að 40 dagvinnustundum til námskeiðssetu á fagtengdum námskeiðum án skerðingar á föstum launum, þó þannig að a.m.k. helmingur námskeiðsstunda sé í hans eiginn tíma. Réttur þessi kemur í stað þess réttar sem getið er í 1. mgr.
Tími til námskeiðssetu skal valinn með hliðsjón af verkefnastöðu viðkomandi fyrirtækja.
 

FAGTENGD NÁMSKEIÐ Í BÍLGREINUM

Til viðbótar áður umsömdum rétti til að sækja fagtengd námskeið verður starfsmönnum nú heimilt að geyma rétt sinn milli ára þannig að greiðsluréttur getur orðið allt að 32 dagvinnustundir.
 

Starfsmenn sem unnið hafa þrjú ár samfellt hjá sama fyrirtæki skulu á tveggja ára fresti eiga rétt á allt að 40 dagvinnustundum til námskeiðssetu á fagtengdum námskeiðum án skerðingar á föstum launum . Réttur þessi kemur í stað þess réttar sem getið er í 1. mgr.
 

VEIKINDI BARNA

Á fyrsta starfsári hjá sama vinnuveitanda skal foreldri heimilt að verja tveimur dögum fyrir hvern unninn mánuð, þangað til rétturinn verður 12 dagar á hverju 12 mánaða tímabili, til aðhlynningar sjúkum börnum sínum undir 13 ára aldri, enda verði annari ummönnun ekki við komið og halda þá dagvinnulaunum sínum, svo 
og vaktaálagi þar sem það á við.
 

NÝ ÁKVÆÐI UM UPPSAGNIR

Almennt um uppsagnir

Uppsagnarfrestur er gagnkvæmur. Allar uppsagnir skulu vera skriflegar og gerðar á sama tungumáli og ráðningarsamningur starfsmanns.

Viðtal um ástæður uppsagnar

Starfsmaður á rétt á viðtali um starfslok sín og ástæður uppsagnar. Beiðni um viðtal skal koma fram innan fjögurra sólarhringa frá því uppsögn er móttekin og skal viðtal fara fram innan fjögurra sólarhringa þar frá.

Starfsmaður getur óskað þess að loknu viðtali eða innan fjögurra sólarhringa að ástæður uppsagnar séu skýrðar skriflega.

Fallist atvinnurekandi á þá ósk hans, skal við því orðið innan fjögurra sólarhringa þar frá.

Fallist atvinnurekandi ekki á ósk starfsmanns um skriflegar skýringar, á starfsmaður innan fjögurra sólarhringa rétt á öðrum fundi með vinnuveitanda um ástæður uppsagnar að viðstöddum trúnaðarmanni sínum eða öðrum fulltrúa stéttarfélags síns ef starfsmaður óskar þess.
 

SAMNINGSFORSENDUR
- FRAMLENGING EÐA UPPSÖGN

Sérstök forsendunefnd skipuð tveimur fulltrúum tilnefndum af samninganefnd ASÍ og tveimur af SA skal taka þegar til starfa. Hún skal fjalla um þróun efnahagsmála á samningstímanum og eftir atvikum leita eftir samstarfi við stjórnvöld, í því skyni að stuðla að því að markmið samnings þessa um lága verðbólgu og sérstaka hækkun lægstu launa nái fram að ganga. Í byrjun febrúar 2009 skal fjalla sérstaklega um framlengingu samningsins fyrir tímabilið 1. mars 2009 til 30. nóvember 2010 Samingurinn framlengist til 30. nóvember 2010 hafi báðar forsendur samningsins staðist.
 

1. Annars vegar þarf kaupmáttur launa á almennum vinnumarkaði að hafa haldist eða aukist á samningstímanum (tímabilinu janúar 2008 - til desember 2008) samkvæmt launavísitölu Hagstofu Íslands.
 

2. Hins vegar þarf verðbólga að hafa farið lækkandi. Með lækkandi verðbólgu er átt við að verðbólga innan ársins 2008 þ.e. 12 mánaða verðbólgan í desember 2008 sé lægri en 5,5%. Ennfremur að verðbólga á 6 mánaða tímabilinu ágúst 2008 - janúar 2009 sé innan við 3,8%, miðað við árshraða.
 

Nú hefur önnurhvor samningsforsendan eða báðar ekki staðist skal þegar í stað kalla saman fund samninganefndar ASÍ og SA sem leita skal samkomulags um viðbrögð til að stuðla að framgangi markmiðs samningsins, festa forsendur hans í sessi og tryggja að samningurinn haldi gildi sínu. Nú næst ekki samkomulag og skal þá sá aðili sem ekki vill framlengingu samningsins skýra frá þeirri ákvörðun og fellur þá samningurinn úr gildi frá lokum febrúar 2009, ella framlengist samningurinn til 30. nóvember 2010.
 

AÐKOMA STJÓRNVALDA

Af hálfu stjórnvalda koma aðgerðir í skatta¬málum með hækkun skattleysismarka og barnabóta. Í húsnæðismálum er dregið úr skerðingu vaxtabóta vegna eigna, húsaleigubætur hækka og framboð aukið af félagslegu húsnæði.